टेक्सासको नेपाली समुदायले फेरी अर्का नेपाली युवालाई गुमाएको छ । टेक्सासको डालसबाट घुमफिरका लागि ओक्लाहोमाको टर्नर फल्स पुगेका ४ नेपाली युवा युवती मध्य युवकको पौडी खेल्ने क्रममा निधन भएको हो ।

नेपाली समाज टेक्सास एनएसटीले यस विषयमा दिएको जानकारी अनुसार यस अप्रिय घटनामा परि नेपाल बुटवल मणिग्राम घर भै हाल टेक्सासको नर्थलेक कलेजमा अध्ययनरत कोशल पराजुलीले ज्यान गुमाएका हुन् । पौडी खेल्ने क्रममा उनको घटनास्थलमा नै मृत्यु भएको हो ।

मृतकको शव यतिवेला ओक्लोहोमा मेडिकल इक्जामिनरसंग रहेको छ । आवश्यक प्रकृया पुर्याएर डालास ल्याइने र परिवारको सल्लाहमा नेपालमा वा डालसमा दाहसंस्कार गरिने जानकारी एनएसटीले दिएको छ ।

यस घटनामा उद्धार गरि अस्पताल पुर्याईएकी युवती झापा घर भै हाल डालसमा बसोबास गर्दै आएकी शुरक्षा घिमिरे रहेकी छन् । उनको मर्सी अस्पतालको आईसीयु कक्षमा उपचार भै रहेको छ ।

हिजो साँझ ओक्लाहमा स्थित ईष्ट सेन्टरल युनिभर्सिटीमा आफ्नो सामान लिन टेक्सासबाट गएका शुरक्षा घिमिरे सहित ३ युवती र मृतक कोशल पराजुली फर्कने क्रममा टर्नर फल्स पुगेका थिए । टर्नर फल्स घुमेर टेक्सास फर्कने योजनामा रहेका उनिहरुले अप्रिय घटनाको सामना गर्नु पर्यो ।

यतिबेला अस्पतालमा उपचाररत घिमिरेलाई ईस्ट सेन्टरल युनिभर्सिटीका विद्यार्थीहरुले कुरिरहेका छन् । उनिहरुसंगै मृतकका परिवार, ओक्लाहोमा प्रहरी प्रशासन, घाईते उपचाररत मेडिकल टिम र मृतक पराजुलीको शव राखिएको अस्पताल प्रशासनसंग नेपाली समाज टेक्सास सम्पर्कमा रहिरहेको जानकारी एनएसटीले दिएको छ ।

अमेरिकाको अर्बकल पर्वत हनी क्रिकमा रहेको टर्नर फल्स विसाल झरना हो । दक्षिण-मध्य ओक्लाहोमा रहेको यस झरना 77 फिट उचाइको रहेको छ । ओक्लाहोमाको सबैभन्दा अग्लो झरनाका रुपमा रहेको टर्नर फल्स धेरैको आकर्षणको केन्द्रका रुपमा रहेको छ । यद्यपी पौडी खेल्ने क्रममा टर्नर फल्समा बर्षेनी मानिसहरुले ज्यान गुमाउँदै आएका छन् ।(श्रोत: रिपोर्टस क्लब अमेरिका ।)