क्यानडाको टोरन्टोमा १२ औं हिमालयन फेस्टिभल–२०१८ सम्पन्न भएको छ । प्रत्येक वर्षको सेप्टेम्बर १ का दिन आयोजना हुने मेला यो बर्ष पनि सफलतापूर्वक सम्पन्न भएको आयोजक संस्थाले जनाएको छ । यसपटकको मेलामा लोकप्रिय गायक रामकृष्ण ढकाल आकर्षणको केन्द्र बनेका थिए । उक्त कार्यक्रममा सहभागिता जनाउन गायक ढकाल पहिलो पटक क्यानडा पुगेका हुन् । हजारौं नेपाली सहभागि मेलाको कन्सर्टमा गायक ढकालले बिहान उठ्ने बित्तिकै...गीतमार्फत सांगीतिक प्रस्तुती प्रारम्भ गरेका थिए । राष्ट्रिय पोशाकमा सजिएर यो गीत प्रस्तुत गर्दा दर्शक दिर्घामा भावुकता छाएको थियो भने केही दर्शकका अँखा रसाएको थियो । कार्यक्रममा ५-६ हजार नेपालीहरुको सहभागीता रहको अनुमान गरिएको छ । फेस्टिबलमा नेपाली कला, संस्कृति, भेषभुषा, खाना र सांगीतिक प्रस्तुति समेत प्रदर्शन गरिएको थियो । यसैबीच क्यानडाको ओटावामा आयोजित रामकृष्ण ढकाल साँझ समेत भव्यताका सम्पन्न भएको सुसोस इन्टरनेशनलले जनाएको छ । कार्यक्रममा क्यानाडास्थित नेपाली राजदूतावासका राजदुत काली प्रसाद पोखरेलको समेत उपस्थिति रहेको थियो । उक्त कार्यक्रममा ढकाले दुई दर्जनभन्दा बढि गीत गाए । ढकालले गाइरहँदा उपस्थित दर्शकले स्वरमा स्वर मिलाएर साथ दिएका थिए । कार्यक्रम तीन घन्टासम्म चलेको थियो । सांगीतिक प्रस्तुतिका अतिरिक्त ढकाल घुमघाममा ब्यस्त देखिन्छन ।