लामो प्रतिक्षाको घडी सकिएको छ । अमेरिकाको बाल्टिमोरमा नेपाली मुलका उमेद्वार ह्यारी भण्डारीले डिष्ट्रिक ८ बाट स्टेट डेलिगेटमा चुनाब जितेका छन् । यो समाचार तयार गर्दैगर्दा चुनाबको नतिजा कुर्न भेला गरिएको स्थानीय माउन्ट एभरेष्ट रेष्टुरेन्टमा झन्डै पांच सय बढी नेपाली देखिएका छन् भने खुशीको माहौलको बर्णन गर्न असम्भव नै छ । उनको विजयले उनका अमेरिकी भोटर र यहाँका नेपालीहरु मात्र होइन विश्वभर छरिएर रहेका नेपालीहरुमा खुशी संचार भएको छ । अमेरिकी राजनीतिमा नेपाली मुलको राजनीतिज्ञ चुनाव जितेर यो पदमा पुगेको पहिलो पटक हो । ह्यारी भण्डारीले कुल ८० हज़ार मत मध्ये २० हजार ९ सय ७७ मत ल्याएर विजय प्राप्त गरेका हुन् । उनी दोस्रो स्थानमा परेका छन ।। आजको दिनमा मात्र झन्डै २ सय नेपालीले स्वयंसेवक भएर खटिएका थिए । अमेरिकामा हरेक दुई वर्षको नोभेम्बर ६ निर्वाचनको दिन हो । दुई बर्ष पहिले २०१६ नोभेम्बर ६ मा राष्ट्रपति निर्वाचन भएको थियो । अहिले केन्द्रीय प्रतिनिधि सभाको ४३५ सिट, केन्द्रीय सीनेटको एक सय मध्ये ३३ सिट, ३६ गभर्नर तथा राज्य सिनेट र राज्य डेलिगेटस ( विधायक सभा ) का साथै स्थानीय तहको निर्वाचन भएको हो । त्यसै मध्ये ह्यारीले बाल्टिमोर काउन्टीको डिष्ट्रिक ८ बाट राज्य डेलिगेटस ( विधायक सभा ) मा जीत हासिल गरेका हुन् । मेरिल्याण्ड राज्य डेलिगेटस सभामा ४७ डिष्ट्रिकबाट एक सय ४१ जना सदस्य रहन्छन् । भण्डारी उम्मेदवार रहेको डिष्ट्रिक नम्बर आठबाट तीन जना निर्वाचित हुन्छन् । जनसंख्याको अाधारमा डिष्ट्रिकबाट निर्वाचित हुने सिट संख्या फरक हुन्छ । डिष्ट्रिक अाठमा तीन सिटमा ६ जना उम्मेदवार थिए ।३ जना डेमोक्र्याट र ३ जना रिपब्लिकन । ह्यारीको नेपाली नाम हिरा बहादुर भण्डारी हो । उनि ४१ बर्ष अगाडी नेपालको पर्वत जिल्लामा जन्मिएका थिए । अमेरिका आएसँगै एच बी भण्डारी हुँदै अहिले ह्रयारी भण्डारी नामले चर्चित छन् । केहि महिना अगाडीको प्रारम्भिक चरणको निर्वाचनमा ह्यारी डेमोक्र्याटबाट यो प्रतिस्पर्धाका लागि चुनिएका थिए । उनको पार्टीबाट ३ जना उमेद्यार चाहिने मा ४ जना ईच्छुक भएकोले पार्टीभित्र नै चुनाव भएको थियो । अमेरिकी निर्वाचनमा विपक्षी पार्टीको उम्मेदवारसँग प्रतिस्पर्धा गर्नु अगाडी आफ्नै पार्टी भित्र हुने चुनाव जित्नुपर्ने प्रावधान छ, जसलाई प्रारम्भिक चरणको निर्वाचन भनिन्छ । सो चरणमा भण्डारी चार उम्मेदवार मध्ये दोस्रो भएका थिए । ठिक चार बर्ष अगाडी पनि भण्डारी यो यात्रामा होमिएका थिए । तर, प्रारम्भिक चरण मै आफ्नै साथीहरुबाट पराजित भएका थिए । यस्तै उनी डेमोक्रेटिक पार्टीको मेरिल्याण्ड राज्यको निर्वाचित केन्द्रीय सदस्यमा पनि हुन । लामो चुनावी रसाकस्सीले थाकेका भण्डारी र भण्डारीको चुनाबी टिम नतिजापछी अहिले विजयोत्सव (भिक्ट्री पार्टी) मा रमाईरहेको छ । यो विजयले नेप्लिज डायस्पोरामा नयाँ आयाम थपिएको ह्यारी भण्डारीको चुनावलाई नजिकबाट हेरेका पत्रकार नारायण श्रेष्ठले बताए । "अमेरिका अवसरको देश हो र सम्भावनाको देश हो । यो चुनावको नतिजाले यहि कुरा प्रमाणित गरेको छ ।" भण्डारीले चुनाव जित्ने बित्तिकै नेप्लिज डायस्पोरासंग प्रतिक्रिया दिदै भने ।