एनआरएनए अमेरिकाको अध्यक्षको पदमा सुर्य लम्सालले उठने घोषणा गरेका छन् । अमेरिकाको न्युयोर्कमा एक बिशेष कार्यक्रमको आयोजना गरेर लम्सालले उक्त घोषणा गरेका हुन । घोषणा सभामा लम्सालले एनआरएन अमेरिकालाई सबै नेपाली समक्ष पुर्याउन उद्देश्यले आफुले उमेद्वारी दिएको बताएका थिए । उक्त कार्यक्रममा न्यु योर्कका नेपालीहरुको सहभागिता रहेको थियो । साथै अमेरिकाका बिभिन्न राज्यबाट पनि एनआरएनप्रेमी व्यक्तित्वहरुको सहभागिता रहेको थियो । एनआरएन अमेरिकाको अध्यक्ष पदमा यस अघि नै सुनील साह, संजय थापा र अर्जुन बन्जाडेले उठ्ने घोषणा गरिसकेका छन् । सबैको घोषणा सभा हेरेर धैर्यताका साथ लम्सालले यो घोषणा सभाको आयोजना गरेका हुन । अघिल्लो पटक उठेर पराजित कृष्ण पोखरेल पनि उठ्ने जानकारी गराएका छन् । लम्साल अन्य टीममा उठ्ने छन् भन्नेहरु धेरै थिए तर, उनको घोषणा सभाले अमेरिकामा एउटा नयाँ हलचल नै ल्याएको छ ।हिजोसम्म लम्सालको उमेद्वारीलाई सामान्य लिनेहरु पनि आजदेखि अलि गम्भीर भएको बुझिएको छ । आईतबार साँझ नै सुनिल साह र संजय थापाको टीममा बिशेष छलफल भएको जानकारी पनि नेप्लिज डायस्पोरालाई प्राप्त भएको छ । सबै जातजाति र पार्टीलाई समेटेर बृहत आन्तरिक गृहकार्य सहित लम्साल बलियो भएपछी मात्र अगाडी आएको विश्वास गरिएको छ । राजनीति र पैसाको आडमा गरिएको एनआरएनको हालसम्मको खिचातानीबाट वाक्क भएका अमेरिकाका मध्यमार्गी मतदाताहरु लम्सालको पक्षमा आउने विश्वास पनि लम्साल समर्थकहरुको छ । लम्साललाई समर्थन गर्नेहरु बाहिर नदेखिएका तर निर्वाचनको अंक गणितमा राम्रो प्रभाव पार्न सक्नेहरु रहेको टिमका एक सदस्यले बताए । अरु टिममा फोटो आएकाहरुले पनि अन्तिममा लम्सालको टिमलाई सघाउने वचन दिएको पनि बुझिएको छ । "स्यांग्जा ज्याग्दी खोलाका लम्साल नपत्याउने खोला बनेर पटक पटक एनआरएनको निर्वाचनमा होमिने गरेका छन् । यो पटक पनि त्यो खोला शुरुमा नपत्याउने खालको नै देखिन्छ, तर मुहानतिर ठुलै बाढी आईसकेको छ |" आजको कार्यक्रम हेरेका एक मतदाताले नेप्लिज डायस्पोरासंग भने ।