पाल्पा, १७ असोज ।
अनुपम सिर्जना प्रतिष्ठान नेपाल, कलङ्कीको आयोजनामा १६२ औँ नियमित प्रविधिमैत्री चाडपर्व विशेष कविगोष्ठी शनिवार सम्पन्न भएको छ । संस्थाका अध्यक्ष भुवनहरि सिग्देलको अध्यक्षतामा आयोजित सो कार्यक्रममा पुरुषोत्तम सिग्देल प्रमुख आमन्त्रित समीक्षकका रूपमा रहनुभएको थियो भने डा. बमबहादुर थापा जिताली र कलानिधि दाहाल विशिष्ट अतिथिका रूपमा उपस्थित हुनुहुन्थ्यो ।
उपत्यकाको पश्चिम भेकमा क्रियाशील यस संस्थाको गोष्ठीमा सर्जकहरूले देशप्रेम, सामाजिक विकृतिविरुद्धका व्यङ्ग्य, जनचेतना तथा चाडपर्व विशेष भावका छन्द, लोकछन्द, स्वच्छन्द कविता, गजल, उदक, चारु र सुसेलीलगायतका रचना सुमधुर लयमा प्रस्तुत गर्नुभएको थियो ।
कार्यक्रममा वाचन गरिएका स्रष्टा, विधा/छन्द र रचनाका शीर्षकहरू यस प्रकार रहेका छन्:
भुवनहरि सिग्देल (सवाई - ‘मलाई पर्यो गाह्रो)
पुरुषोत्तम सिग्देल (चारु - ‘इमान)
कलानिधि दाहाल (अनुष्टुप् - ‘दशा दशैँ गरीबको)
बमबहादुर थापा जिताली (अनुष्टुप् - ‘विपत्तिमा मिली जुटौँ)
हरि खनाल (अनुष्टुप् - ‘म ठुलो कवि हुँ)
नरनाथ लुइँटेल (सवाई - ‘देश दुख्यो)
दुर्गा अधिकारी (सुसेली - ‘चाडवाड)
जितु खड्का (‘शुभकामना)
वासु ठकुरी (अनुष्टुप् - ‘लेखक)
जगदीश्वर पोखरेल (समानिका - ‘दशैँ)
विनुबाबा घिमिरे (स्रग्विणी - ‘भाउजू)
उत्तम भेतुवाल (अनुष्टुप् - ‘सोचिन्त्य)
चन्द्र न्यौपाने (सुसेली / सवाई - ‘दशैँ ढपक्कै)
सुधा बाँस्कोटा (भुजङ्गप्रयात / गजल)
टेकबहादुर लौडारी (चारु - ‘आयो दशैँ त भन्छन्)
द्वारिका कुँइकेल (सुसेली - ‘दशैँ तिहार)
आर्त अकुलीन (उदक / सुसेली / चारु - ‘शृङ्गारिक)
पवनकुमार बुढाथोकी (चारु - ‘शृङ्गारिक)
वीरबहादुर लोहनी (सवाई - ‘दशैँ)
कार्यक्रमका प्रमुख समीक्षक पुरुषोत्तम सिग्देलले अनुपम सिर्जना प्रतिष्ठानले नेपाली भाषा र छन्दको उन्नयनमा उल्लेखनीय योगदान पुर्याएको बताउनुभयो । उहाँले यस मञ्चले स्थापित तथा नवोदित सर्जकहरूलाई सिक्ने र आफ्ना रचना प्रस्तुत गर्ने राम्रो अवसर प्रदान गरेको उल्लेख गर्दै वाचित कविताहरूको समीक्षा समेत गर्नुभएको थियो । सो अवसरमा समीक्षक सिग्देलको रचनामाथि कलानिधि दाहालले समीक्षात्मक टिप्पणी गर्नुभएको थियो ।
उपाध्यक्ष जगदीश्वर पोखरेलले स्वागत मन्तव्य व्यक्त गर्दै सर्जकहरूको माया र निरन्तरको उपस्थितिले संस्था जीवन्त बनेको बताउनुभयो । कार्यक्रमको कुशल संयोजन समेत उपाध्यक्ष पोखरेलले गर्नुभएको थियो ।
अन्तमा अध्यक्ष भुवनहरि सिग्देलले संस्थाको निमन्त्रणा स्वीकार गरी गोष्ठीलाई सफल बनाउनुहुने सम्पूर्ण सर्जकहरूप्रति आभार व्यक्त गर्दै कार्यक्रम समापन गर्नुभएको थियो ।
.png)
